أخباررأي

الطيب عبدالماجد .. يكتب : السودانيين في مصر يجب أن تتجاوزو فكرة الربح الأعلى من التوقعات الكانت في السودان دي …!!

الطيب عبدالماجد .. يكتب : السودانيين في مصر يجب أن تتجاوزو فكرة الربح الأعلى من التوقعات الكانت في السودان دي …!!

( بلدنا نعلي شانا ياناس )

السودانيين الفي مصر والذين يتجهوا نحو تأسيس منصات اعمال أياً كان شكلها مطعم أو محل تجميل أو حلاق أو توزيع وإعادة توزيع أو أي مشروع آخر…

يجب أن تتجاوزوا فكره الربح الأعلى من التوقعات الكانت في السودان دي …!!

النموذج الاقتصادي المصري دا نموذج مختلف شكلا وموضوعاً فهو يعتمد على الكم وليس الكيف فقط
بمعني أن عدد الناس هو الذي يحدث الفرق ..
لذلك الأرباح عادة تكون معقوله لكن التركيز على عددالعملاء أكبر أياً كان شكل المشروع لذلك سيجد الشخص العديد من البدائل المتاحة

ويجب أن تضعوا في حساباتكم أنكم لستم الأجود ..ولستم الأفضل ولستم الوحيدون ……
بناء عليه فعامل التجويد والسعر المعقول حاسم في هذا الاتجاه

بعدين سؤال مهم …..!!

لييييه ما بتحافظو على جودة المنتج
بذات الشكل في ضربة البدايه وعند إطلاق المشروع ..؟؟

ما إنت عايز إستمرارية وتفوق …..!!!؟؟ مش كدا
ديل ما بتلقن بجنس الحالة دي …
لأنو ( ضبط الجودة ) دا واحد من أهم معايير هذا العصر ابتداءاً من المشاريع الصغيرة ومتناهية الصغر حتى ( صناعة الآيفون ) …!!

حاجه تانيه مهمة شديده …!!

شنو يعني محل فتح الله عليه من الزبائن وساق له الرزق
والناس واقفين صف ….!!
واااااحد بس واقف ببيع
( ضهرو اتقصا )

وواحد في ( الكاشير ) معاهو ود خالتو بوري فيهو في حاجات كدا في التلفون …والناس واقفه منتظرة الدور …!!

ولا عايز يتكرم يجي يساعد الواقف دا …

دا شغل ( ني ) بودي الخور …!!

جيبو تلاته بياعين ( لهاليب ) زي المصريين ديل
أديهم مرتب ..تكون شغلت ليك ناس وسرعت شغلك
ودخلك حيزيد …. المعادله دي واضحة ما دايره
ليها ( ماركتنغ وعلم تسويق !!

واخد بال حضرتك

ما بالضرورة كلنا نفتح مطاعم هناك أفكار خارج الصندوق
باعادة تقديم منتجات سودانية بشكل أفضل مثلاُ
لاستهداف مشتري (غير سوداني ) وهنا بيت القصيد
النموذج السوري في سوق العمل المصري مهم
في الحتة دي للدراسة والرؤيه…من حيث استهداف زبون غير سوري ..!!

شي مهم تاني ….نحن لازم نعرف ميزاتنا التنافسيه
والقيمة المضافة عندنا شنو …!!؟؟
وشنو البخلي الكلام دا يتحقق

تجويد المنتج مفصلي ويجب ان تقدمه بشكل جيد وبسعر يتناسب ومدخلات الإنتاج هنا أكثر وفرة وأرخص سعر
معلي السعر لي شنو …!!؟؟
( عادات وتقاليد )

ما مكن طرقة ( آبري) بمبلغ وقدرو عشان حنينة

حديثي هذا لايقتصر على التجربة السودانية في مصر …
فقط تناولتها لأنها حديثة نسبيا لكن ملاحظاتي تتشاركها كثير من التجارب السودانيه في دول أخرى وهي تجارب تبدو قديمة وراسخة …لكن لازالت عليها كثير من الملاحظات

وبعد هذا التاريخ دا كلو …تجي لي واحد فيهم تقول ليهو عايز طعميه !!

(( معناها منتج مرغوب وعندو زباين ))

يقول ليك الطعميه كملت

( حرام عليك )

…الطعميه البكملا شنو ……؟؟

ماتعمل واحده تانيه …المافي شنو ..؟؟

وحوض الغسيل دا ( مشقوق ) مالو ..؟؟؟

( مغسة…!!؟؟)

النضافة مفصلية

في حاجه إسمها ( اقتصاد العربة ) حاتكلم عنها في بوست ّ
اخر دي بتتيح لكثير من شبابنا المظلومين ديل العمل عن بعد
وتحقيق دخل أفضل بعيدا عن المطاعم والمقاهي
والمشاريع الشبيهة فهذه قطاعات لايستطيع أي أحدٍ الدخول فيها وتحفها كثير من المخاطر …إذًا لم تقدم وفق رؤيه ودراسة ….!!

تحية خاصة لنساء بلادي الساطعات وهن لم يستسلمن للظروف يبحثن عن أي فرص عمل شريفة في زمن الحرب والجدب ولم يتوقفن أمام عصف الحياة …وجبروت النزوح
يتحركن في كل اتجاه أكل وشراب ومنتجات وكل شيئ شريف فلهن كل الدعم والتحية لاخوات الرجال …!!
ويجب إيجاد آليات للاستفادة من ما يقدمن بشكل أكبر وأكثر جدوى

منانا فقط إنو نشوفكم متقدمين ومنافسين ….
والسودانيين ديل في ظرف استثنائي قدمو ليهم المنتجات بسعر معقول وجودة أكثر وأنا بعرف كويس معادلة الانتاج المصرية
وأسعار مدخلات الإنتاج في كثير من القطاعات …ليبسط في رزقكم ويرزق من يشاء بغير حساب

خير اللهم اجعله خير …!!وربنا يوفقكم

اظهر المزيد

الرؤية 24

الرؤية 24 موقع إخباري سوداني شامل يهتم بنشر الأخبار العاجلة المحلية والإقليمية والعالمية بكل دقة ومصداقية وحيادية من خلال مصادر أخبار تغطي كل المدن والعواصم

مقالات ذات صلة

اترك تعليقاً

زر الذهاب إلى الأعلى